Piykny fajer, jakich mało

Chwalyńcickie gospodynie czynsto organizujom ciekawe wycieczki, a jak przidzie lato umiom cołko wioska ruszyć, tak jak w sobota 24 maja.

Zrobiyły piykny fajer miyszkańcom Chwalyńcic, a tak im pogoda spasowała, że chyba umiom tyż czarować abo dobrze rzykać, bo przeca colki czas padało i zimno było, a w tyn dziyń choby rynkom odjon – dyszcz niy padoł i nawet słoneczko sie pokozało i ciepło było.

Z Radom Dzielnicy i z Ochotniczom Strażom Pożarnom z Chwalyńcic tyż poradzom sie dogodać i wspolnymi siłami zrobiyli festyn, jakich mało.

Plac z binom i kryngiym tanecznym

Trza tukej pedzieć, że miejsce na taki festyny majom Chwalyńcice chyba nojlepsze w cołkim Rybniku i inksze dzielnice mogom im tego zowiścić. Na gorce w nojwyższym punkcie Chwalyńcic jest  przirychtowany plac z binom i kryngiym tanecznym. Z tego miejsca rozciongo sie widok na cołko okolico i przi fajnyj pogodzie widać bazylika rybnicko, chałupy w środmieściu i Elektrownia Rybnik jak na tablecie, a wszystko przeplotane zielyniom i przeblyskujoncom wodom z rybnickigo morza.

Ciepłe krupnioki i grochowa

Chwalyńcickie gospodynie zadbały o wszystkich. Był dobry kołocz swojskij roboty, że palce lizać i bonkawa ku nimu, były krupnioki ciepłe, grochowa z kuchnie polowyj, kero rozsiywała woń polonego drzewa i wyndzonki. Były tyż stojiska ze zupom chmiylowom, kero chopom nojlepij podłaziyła. Dlo dziecek były tyż rostoliczne konkursy z nagrodami, bo przeca gospodynie poradziyły tyż bogatych sponsorow podyńść. Były tyż karasole, trampolina, zjyżdżalnia i autka na kryngu tanecznym, to tyż dziecka miały raj. 

Ślonski taniec „mietlorz"

Nojwiykszo jednak bajtle uciecha miały siednyć do bojowego auta fojermańskigo z miejscowyj OSP, a jak im jeszcze załonczyli te syryny, to sie fojermany niy poradziyli odegnać od dzieci. Rada dzielnice zaś załatwiyła muzykantow, tak że tańczyć ludzie mogli do poźnyj nocy przi piyknyj muzyczce. Trza tu tyż wspomnieć o dzieckach z chwalyńcickij szkołki, bo tak piyknie bawiyły swojimi wystympami zebranych ludzi, że oklaskom niy było końca. Nojprzod zatańczyły ślonski taniec „mietlorz”, zaś niyskorzij śpiywały dziecka swojim mamulkom na przileżytość „Dnia matki”. Wielki brawa należom sie tyż przedszkolankom za taki przirychtowanie tych wystympow – jednym słowym, jak jest miłośc i zgoda, to idzie sie piyknie zabawić i mile wspominąć taki majowe festyny.

Bogdan Dzierżawa