Sobota, 18 maja 2024

imieniny: Eryka, Aleksandry, Feliksa

RSS

Czamu dziecka majom sprzontać za starymi?

19.09.2006 00:00
Człowieku! U żródeł rzeki czystej wody się napiłeś, dlaczego jej koryto tak zanieczyściłeś!
Skończyły się feryje, pomału kończy się lato, zaczyno się szkoła. Przisłowi godo: „Oto wrzesień -blisko jesiyń”. Niech już to tak leci. W połowie września dzieci dostali worki, rynkawiczki i wypełniajom hasło: ”Sprzątanie Świata”. Od pora lot jedno i to samo, a tak co prawie szkoda czasu i piniyndzy, bo te akcje som dość kosztowne. A możno w tym roku bydzie inakszy?. Bo do wychowanio patriotycznego bych tego szwyndanio się dziecek po lesie nie zaliczyła! Czamu dziecka majom sprzontać za starymi? Bo przeca flaszek po gorzołce one nie naciepały. Sprawiedliwie byłoby żeby se starzi poschraniali a dzieckom dowali przikłod jako mo wyglondać szanowani przirody i drugigo człowieka. Bo kieby tak szło prziwachować tych mondrali, co śmieci zostawiajom, abo od chałupy po cimoku wynoszom, i wiycie kaj? - do kubłow na przistanku autobusowym!. Te piykne pomalowane przistanki (no bo ku wyborom) majom gryfne kubły przeznaczone na taki odpadki jak: stary bilet, paczka z cygaret, ogryzek z jabka. Ciekawe jako się tam znojdzie flaszka po occie abo magi. Z gorzołki też się trefi (ale to już lepszy niż pociepnyć pod ławka). Zdarzy się, że przi kubełku znojdzie się siatka z roztomańtymi klamorami kere se mondry gospodorz od chałupy wyniesie. A nikiery miyszko daleko od przistanku. Stoji taki, że to niby czako na autobus, a jak przijedzie to on boroczek tej reklamowki „zapomni” i czako tyn pakietek aż przidzie ekipa i bez zapłaty to chacharstwo wywiezie. A nasi zachodni somsiedzi co to robiom? Bez granica swoji śmieci u nas ściepujom? Jeszcze bardzij nas chcom upokorzyć. Czy se tak za dużo nie pozwalajom? Dobrze, że pogranicznicy choć trocha tych naladowanych aut nazod cofli. Somsiedzi, a ani za grosz ni majom gańby.
 
Downij ludzie to ni mieli takigo pomyślunku żeby swoji śmieci podciepnyć drugimu, bo też tych flaszek po zymfcie nie było tak moc. Teraz spomino mi się jak to kiejś my chodziyli kupować. Moji rowniocy to też bydom pamiyntać, ale napisza to tym, co to zaś bydom sprzontać. Plastikowe flaszki kierych jest nejwiyncyj chnet napełniom worek. Chca powiedzieć o szklanych flaszkach, kiere tak nie trujom i o tym jak my wtedy już używali tzw. ”surowcow wtórnych”. Bo tak po ocet, magi, marmelada, ogórki kiszone, charynki szli my dycko ze swojom miskom (dycko my brali tako fajniejszo). Kupiec z wielkij beczułki abo flachy nalywoł abo nakłodoł do prziniesionego naczynia. Dyć flaszka mogła być wziynto wiyncyj razy a nie rosła chołda plastikowych koflikow jak teraz.
 
Momy przed chałupom kubły na odpady za opłatom som wywożone na wysypiska. Ale dyć jak to leży i gnije na tym wysypisku to smrod niesie się do wsi, ludzie się buntujom, bo zatrute powietrze niesie choroba. Szkoda tych piyknych lasow, kiere som niszczone przez robactwo i ludzi. Teraz i gorole som przimuszani żeby mieć przi chałupie kubły, bo możno z nimi też nie było najlepszy. Coż z tym jak trujom ich somsiedzi od połednia, u kierych jest tako wielko dymionco elektrownia... A w rzykach wiela roztomańtego chacharstwa się spotyko, jak ludzie sami się nie opamiyntajom to żodne „Grinpis” ani inksi „Zieloni” nie pomogom. Tela bych tym niszczycielom zielyni i wody kozała napisać i postawić tabliczka ku opamiyntaniu: „Człowieku! U żródeł rzeki czystej wody się napiłeś, dlaczego jej koryto tak zanieczyściłeś!”
 
Ślonzoczka Aniela
  • Numer: 38 (347)
  • Data wydania: 19.09.06