Jak padze bajtlom sie mierznie

No i momy prawdziwo jesiyń-ukidano, szaro i posympno. A jak tako pogoda, to człowiek doma siedzi i nikandzi nie łazi, bo przeca zima i na pukiel kapie.

Nejgorszy, jak takich dni je wiyncyj, to pierońsko sie mierznie, a już nojbardzi bajtlom. Bo przeca bajtle rade na dworze lotać, grzebać w pioskownicy, czy hupsać na trampolinie. A jak padze, toż trza łostać w doma. Ale jo mom na to rada. Nie puszczejcie im bez przerwy pudła zwanego telewizorym, laptopow, tabletow i i-padow, yno zagrejcie ś nimi w jakiś szpil.

Wto dzisio gro w szachy, warcaby, abo monopol. Przeca kiejś to sie grało godzinami, a czas jesiynny i zimowy wartko lecioł. Nie zapomna tyż gry w „człowieku nie irytuj sie” czyli „chińczyka”.

Wiela było śmiechu, jak nikiedy kobla sztyc stowała na 1, a nie 6. No i nojważniejszo sprawa- cołko familijo w kupie. To dycki tworzyło, jak to sie terozki godo- atmosfera rodzinno. Beztoż jak tam kajś jeszcze mocie stare plansze do gry, to ic yno wyciągnyć i grać. A jak ni mocie, toż widziołech łoto we sklepie.

Tako pogoda może mieć dużo plusow. W kominku se idzie nahajcować, uwarzić tyju i łosprowiać o „starych karabinach”. A już nojbardzi lubia szkartować stare fotki i spominać miłe czasy.

Pyrsk

Mierznyć – nudzi

Ukidano – deszczowa

Bajtle – dzieci

Audycja „Rączka gotuje” również w Radiu Vanessa FM od poniedziałku do soboty o 11.45 i 16.45