To som nasze słoneczka

Zaroz w piyrszy dziyń czyrwca dzieci majom świynto. I dobrze, że majom swój dziyń, bo to som nasze roztomiyłe słoneczka.

 

Ostatnio dzieci rodzi się coroz wiyncyj, to skyrz tego „becikowego". Znom przipadki, że z jednego rocznika ojcowie majom porka dzieci a nie som bliźniakami. Abo, taki szczyńści, że w tym samym dniu i miesioncu urodziyła się porka yno, że synek pora lot nieskorzij.

 

Dość czynsto się słyszy, że w rodzinach, kaj som już wielki dzieci znojdzie się jeszcze mały. A, że taki bajtel jest już dość szprytny, taty co mu chcioł powiedzieć, ze bydzie mioł braciszka po prostu zagańbiył, a było to tak: „Wiysz Alojzku, za niedługo przileci tu bocian i ściepnie taki pakietek. A synek pado: „Żeby yno za fest nie trzasło, co by się mama nie zlynkła, bo ona jest w ciąży".... Zaś jedna mama swoji dziołsze poszeptała: „Aneczko wiysz bydziesz mieć siostrziczka, jo jest w ciąży, a dziołcha na to: „A tata wiy?"

 

Downo tymu (ale to jest prowda) mały trzilotek widzioł jak starka szkubie gynś, tak to się robiyło, jak już sie małe pilontka (gonski) wykluły, to gonsiora trza było oszkubać, miyłe to nie było, bo tak żywymu ptokowi pióra wyruwać!? W izbie we skrzince grzoły sie małe pilontka, synek pozaglondoł i zaczon szkubać te małe puszyste gonski. Zdonżył yno dwie oszkubać, bo te oszkubane wedle niego nie umiały chodzić... (po prostu to podusiył)

 

Całe szczyńści, że starka prziszła obejrzeć czamu te pilynta tak piszczom. Dycko się bawiył ziorkami, kere starka prziniosła z gory i porozstwiała w gorneczkach i talyrzikach na delowce. Przez pół dnia przesypywoł te ziorka a jak się mu zmierzło rozsypoł ziorka po całej izbie. Starka zdonżyła za tyn czas pokopać w zegrodce, a synek ji nie deptoł. Teraz już trzidziestoletni synek, jak tego słucho pyto się czy starka go zbiyła. Toż ni-bo tego w zwyczaju ni miała.

 

Życza wszystkim dzieciom, żeby mieli dobrych rodziców, tako starka co na wartko umi zaszyć dziurka, a starzik naprawić koło jak się zepsuje, a tata jest w robocie. Jeszcze muszymy pomyśleć o Dniu Wnuka, bo dzieci rosnom, a taki 16-lotki ani ku dzieciom, ani na dziyń kobiet. Coś trza pomyśleć miyndzy Dniym Babcie i Dniym Dziadka...
Wszystki Dzieci serdecznie całuje (po ronczkach)

 

Ślonzoczka Aniela