Bajka po Śląsku z fabułą... w Rybniku. Napisał ją mieszkaniec miasta

Wilki pitły w głōmb lasu, a młody ksionże niy umioł dość do sia. Przesiedzioł tak w trowie

jeszcze z pół godziny i poszoł do wsi. Tyj nocy już niy zasnōł. Cały czos myśloł ô wilkach.

Ledwa rano usłyszoł kokota, zerwoł sie z wyra i polecioł nad rzyka. Siŏd w tym

samym placu co wczora i czekoł. Niy minyło wiela jak na drugij stronie rzyki ujrzoł piykno

cudzŏ. Ta samo, po kerŏ sam przijechoł. Zerwoł się z trowy i wartko polecioł do nij.

Przelecioł przez mostek i stanōł przed najgyfniejszom dziołchom jako świat widzioł. Duge

szkuty ôpadały jej na ramiōna. Ôczy blyszczōnce i przenikliwe zaglōndały w głōmb jego

duszy. Ôblyczōnõ miała zwiywno kecka, dugõ aże do kostek.

- Jak sie nazywosz - zaczōn ksionże.

- Jo je Ana - ôdpedziała jedbŏwnym głosym.

- Jo żech je ksionże Achim i chca…

- Wiym coś za jedyn i po coś sam przijechoł, ale bydziesz musioł wrōcić z niczym. Coś ty se

myśloł?

- Niy godej takich rzeczy, ô Pani.

- Jo ni ma żodno Pani yno zwykło dziołcha ze wsi. Tyś je gupio ciula. Dyć ôstrzegali cie

ludzie we wiosce.

- Jo ci tak pszaja. Chca cie wrzońść na zomek. Hned bydã królym.

- Ni moga z tobōm jechać. Niy terŏz jak żeś poznoł moji przeklyństwo.

- Tyś była tym wilkiym we nocy? – spytoł Achim – Tyś mie uretowała. Należa do cia.

- W rzici to mom – snerwowała sie Ana – Na zomku niy bydã mogła sie ôpanować. Pożera

wszyskich, a w kōńcu i ciebie.

- Niy. Musi być jakiś knif co by cie ôdczarować. Jak to się stało żeś je wilkiym? Czy te inksze

wilki to tyż sōm ludzie?

- Wiela lot tymu przez moja familijnŏ wieś przejyżdżoł królewski ôrszak. Moja matka wpadła

w ôko królowi, kery chcioł jōm posiednyć. Mój fater to był fest bogaty szlachcic. Niy

pozwolił na to i jōm ôbrōniōł. Tym samym sprowadziōł na familijõ gniyw króla. Tyn kozoł

swojimu magowi ciepnońć najgorszo klōntwa jako umi. Ôd tego mōmyntu moja matka i fater,

zawsze jak miesiōnczek je w połni, zmiyniajōm sie we wilki i gōniōm. Z upływym lot

nauczyli sie w miara nad tym panować. Jo się urodziła pŏrã lŏt niyskorzij i tyż mie ta klōntwa

dosiyngła.